الرئيسة سنية اللولبية ( الحقيقة المرة)

الرئيسة سنية اللولبية ( الحقيقة المرة )

--------------------------------------------------------------------------------
سنية اللولبية راقصة درجة أولى لا داعي أن نتكلم عن جذورها وأصولها بالتأكيد ما حدش ما يعرفهاش
المهم أن سنية وصلت لمرحلة عالية جدا في السلطة تؤهلها لأن تتحكم في مصائر الشعوب وذلك بسبب لولبيتها الغير عادية
سنية وبعد أن بدأت تظهر عليها علامات السن قررت أن تخوض غمار السياسة وحيث أنها طول عمرها عايشة في السياسة يرتمى تحت قدميها كبار رجال السياسة فلا تحتاج إلا لشوية خلفية ثقافية تؤهلها للترشح لكرسي الرئاسة
جلست سنية مع محاميها والذي يعطيها دروس في الخلفية الثقافية يتابعان النشرة:-
- واد يا مشمش
-- أيوة يا أبلتى
- إيه ياواد الزحمة اللى هناك دى
-- دى الثورة البرتقالية يا أبلتى
- وإيه اللى خللاها برتقالية
-- قال إيه الريس الجديد هيدى كيلو برتقال لكل مواطن عشان كده بقت برتقالية
- وعندهم ألوان إيه تانى ياواد
-- بيقولو فيه ثورة مخملية وزمان كان فيه حمرا وبيضا
- أيوة البيضة دى أنا أوعى عليها يا ولا
-- أيوة يا أبلتى دى الثورة اللى الملك فيها مارضاش يسيح دم وإتصرف بجنتله ومشى وساب الدنيا
- طب أمال اللى عندنا ده لازق في الكرسى زى البقة العطشانة نعملولو إيه ياواد
-- تجيش نعمل ثورة يا أبلتى
- وماله نعمل ثورة مانعملش ليه
- هى الثورة عاوزة إيه؟
-- ناس طهقانة
- موجود، وإيه تانى ياواد
-- عاوزة لازم قوة خارجية تدعمها
- وماله دى موجودة الست كونداليزا إلهى يحنن قلبها علينا مش قالت إنها مش عارفة تنام من قلقها على التلامذة اللى عاملين مظاهرات تبقى معانا
--عاوزة إيه تانى
- عاوزة أنفار يا أبلتى
-- سيب الأنفار دى عليا أنا هى المظاهرات اللى فاتت طلع فيها كام؟
- أهو يوم مابيطرشو الدم يطلع فيها الفين واللا تلاتة والحكومة تنزل قدهم مرتين أمن وبكتيره يعملو عشرتلاف
-- عشرتلاف ده إيه ده أنا يوم مابهز في حفلة بيجيلى خمسين ألف
- بص ياواد أنا هاعمل حفلة عند القصر الجمهورى وهاقول إن دى حفلة إعتزال وهيجيلى مش أقل من ميت ألف نفر ونطلع من هناك بيهم على القصر نطلب من الريس يقوم ويقعدنى مطرحه وأكيد مش هيرفضلى طلب أهو على الأقل يطمن على البلد بدل مايمسكوها المشايخ ويطلعو عقدهم علينا
-- بس فاضل حاجة مهمة هنسميها الثورة الإيه
- ودى عاوزة كلام هنسميها الثورة البمبى مسخسخية ياواد .. نزل من بكرة مانشيت (( سنية اللولبية زعيمة الثورة البمبى مسخسخية)).